Nadakpan na ang suspetsado sa pagpusil-patay sa magtiayon ug sa ilang adopted nga dalagita sa San Francisco, Camotes, Sugbo.
Ang suspek giila sa kapulisan na mao si Randy Martinez, alyas “Rey Cabahug Batiller,” 43-anyos, nasikop atol sa usa ka hot pursuit operation nga gipahigayon sa kapulisan sa San Francisco ug Poro. Siya nadakpan sa Sitio Lantawan, Barangay Esperanza, Poro, Camotes, kagahapon Desyimbre 14, 2024.
Base sa imbestigasyon, si Martinez, nga taga Barangay Bancasi, Butuan City, giingong nipusil sa magtiayon nga sila Bernardo Sampan, 42, ug Narcisa Sampan, 41, ug sa ilang 14-anyos nga adopted nga anak nga si Chlea Nicole Villamor. Ang insidente nahitabo sa Barangay Cabunga-an, San Francisco niadtong Huwebes sa gabii.
Matod pa nasuko ang suspek tungod kay wala na siya pautanga ug kwarta sa magtiayon.
Narekober usab sa mga awtoridad ang motorsiklo ni Bernardo, nga gigamit sa suspek sa iyang pag-ikyas, ingon man ang armas nga gigamit sa maong krimen.
Sa pagkakaron giandam na ang kasong multiple murder. (Renante Socia Lada)