Nitahan sa iyang kaugalingon ang aktibong miyembro sa CPP-NPA nga nailhan sa alyas nga “Jojo,” 25-anyos, ug lumad nga residente sa Barangay Sandayao, Guihulngan City, Negros Oriental,
Ang pagbalik sa kagamhanan nahitabo didto sa Barangay General Climaco (Malubog), Toledo City, alas 3:00 sa hapon, Disyimbre 19, 2024.
Ang pagsurrender ni Jojo resulta sa usa ka joint intelligence-driven operation nga gipangunahan sa 703rd Maneuver Company sa RMFB7 ubos sa liderato ni Police Lieutenant Steven Judyll Lapiz Gella, kauban ang uban pang ahensya sa kapulisan nga gipangulohan ni PCOL Jeffrey T. Caballes, Force Commander sa RMFB7.
Sumala sa report, nakigkita si Alyas Jojo sa iyang higala nga si Yolo, usa ka kanhi miyembro sa CPP-NPA nga nisurender na niadtong 2020. Gisugid ni Alyas Jojo ang iyang plano nga mosurender. Gidayon kini ni Yolo ug gipahibalo ang mga otoridad, nga miadto dayon sa lugar aron makumbinsi si Jojo nga mobalik sa sabakan sa gobyerno.
Si Jojo, nga miyembro sa Squad 1, Semi-Legal Team (SLT), Platoon 1 sa CPP-NPA sukad pa niadtong Setyembre 2017, nagsurrender usab og usa ka caliber .38 revolver nga walay serial number.
Gipasalamatan sa mga otoridad ang desisyon ni Jojo nga biyaan ang armadong grupo ug nanawagan usab sa uban pang rebelde nga sundon ang iyang lakang aron makab-ot ang kalinaw. (Renante Socia Lada)Â