Patay ang usa ka seklista nga si Marteniano Torenueva, 52-anyos, human nalatayan sa usa ka Ceres bus pasado alas 4:00 sa hapon, Desyimbre 20, 2024, sa N. Bacalso Avenue, dakbayan sa Sugbo.
Si Torenueva, residente sa A. Lopez St., Barangay Labangon, padulong unta sa iyang trabaho sakay sa iyang biseklita sa dihang natumba kini sa kalsada. Tungod niini, nahagba siya sa dalan ug nalatayan sa nagsunod nga bus.
Matod sa mga nakasaksi, wala nakontrolar sa biktima ang iyang biseklita, nga maoy hinungdan sa aksidente. Padayon pang gihimo ang imbestigasyon aron masuta ang tibuok panghitabo ug kung adunay tulubagon ang drayber sa Ceres bus.
Ang insidente nagdala ug kasubo dili lamang sa pamilya sa biktima kondili usab sa iyang mga kauban sa trabaho ug awhag sa mga otoridad na kanunay mag amping sa pagmaniho sa bisan unsa nga sakyanan. (Renante Socia Lada)