Nahitabo ang usa ka rock fall ug gamay’ng landslide sa Barangay Bagacay, Borbon niadtong Huwebes, Oktubre 16, 2025, diin usa ka dakong bato ang naligid ug napundo sa kilid sa kalsada. Bisan wala’y naigo o naangol, nagpabilin nga delikado ang dapit alang sa mga motorista ug molabay.
Dali nga miresponde ang mga personnel sa Municipal Disaster Risk Reduction and Management Office (MDRRMO) Borbon ug gibutangan og caution tape ang lugar aron magsilbing pahimangno sa mga moagi sa karsada. Gihangyo usab ang publiko nga mag-amping ug likayan una ang pag-agi sa maong bahin sa dalan hangtod nga mahawan kini.
Sa pagsusi sa mga representante sa Mines and Geosciences Bureau (MGB), ilang gihangyo ang mga lokal nga responders nga magpadayon sa pagbantay ug pagmonitor sa kahimtang sa yuta ug sa posibilidad nga adunay mosunod nga pagdaghan sa bato o yuta nga moligid.
Nangayo na usab og tabang ang Borbon LGU aron makahuwam og heavy equipment alang sa paglimpyo sa dalan ug pagpadaplin sa dakong bato. Padayon ang mga otoridad sa pagpangandam ug pag-monitor aron masiguro ang kaluwasan sa mga residente ug motorista nga moagi sa dapit.
I via Renante Socia Lada