Magpadala og psychosocial support team ang Cebu City Government ngadto sa amihanang bahin sa Sugbo aron matabangan ang mga residente nga naapektuhan sa magnitude 6.9 nga linog niadtong Setyembre 30, 2025.
Gipahigayon niadtong Oktubre 16, 2025, ang usa ka coordination meeting nga gitambongan sa Cebu City Disaster Risk Reduction and Management Office (CCDRRMO), Department of General Services (DGS), Department of Social Welfare and Services (DSWS), ug Mayor Nestor Archival.
Matod ni Portia Basmayor, hepe sa DSWS, nga ang psychosocial team nga gilangkuban sa mga doktor ug social worker nga gipangulohan ni Konsehal Michelle Abella, molarga paingon sa Northern Cebu karong, Oktubre 18, aron maghatag og stress debriefing ug emotional support sa mga biktima.
Nakig-alayon ang DSWS sa Social Welfare Offices sa Bogo City ug San Remegio aron mailhan ang mga pamilya nga nakasinati og trauma tungod sa linog. Gawas sa moral nga tabang, dugang relief assistance usab ang ipanghatag sa mga naapektuhan sa maong mga lugar sulod sa semana.
Source: Cebu City PIO
I via Renante Socia Lada