Namatay ang usa ka 50-anyos nga lalaki kinsa rescue volunteer nga mitabang sa operasyon sa midahi nga basura sa Binaliw landfill.
Mahinumdoman sa dakong sakripisyo sa mga boluntaryong responder nga anaa sa unahan sa peligro atol sa kalamidad. Ang biktima, nga taga-Toledo City, namatay tungod sa septic shock nga nagsugod sa impeksyon sa samad sa iyang tiil.
Sumala sa mga opisyal, ang bolunter naka-assign sa ground zero site gikan Enero 10 hangtod 13. Human sa pila ka adlaw nga pagtrabaho sa delikadong palibot ug kanunay nga pagsul-ob og botas, misugod ang kasakit ug migrabe ang samad sa iyang tiil, nga sa ulahi na-impeksyon ug miresulta sa kritikal nga kahimtangan.
Nasuta sa mga medical findings nga ang kahimtangan sa biktima misamot tungod kay siya adunay Type 2 diabetes, usa ka sakit nga makapahinay sa pag-ayo sa samad ug makapagrabe sa impeksyon kung dili dayong matambalan. Nadala ang biktima sa Miller Hospital apan wala na siya maluwas.
Ang insidente naghatag og mas lawom nga diskusyon bahin sa kahimtangan sa health safety sa mga rescue volunteer, ilabi na sa mga operasyon sa landfill ug high-risk areas. Daghan ang nanawagan nga kinahanglan adunay mas istriktong medical screening, regular health monitoring, ug klarong suporta sa kahimsog alang sa mga bolunter.
Sa pagkakaron, naghulat pa ang lokal nga kagamhanan sa opisyal nga death certificate aron makumpleto ang dokumentasyon ug matino ang tabang nga ihatag sa Department of Social Welfare and Development ug sa Cebu City Government sa naulila nga pamilya. Ang kamatayon sa boluntaryo nagpabiling pahimangno nga ang pagtabang sa isigkatawo kinahanglan ubanan og lig-on nga proteksyon sa mga nag-alagad.
I via Renante Socia Lada