Nakasakmit og mga smuggled nga sigarilyo ang Danao City Police Station atol sa ilang gipakusog nga operasyon batok iligal nga patigayon sa Barangay Poblacion, Danao City niadtong Enero 17, 2026.
Ang mga iligal nga sigarilyo narekober gikan sa usa ka street vendor nga nailhan lamang sa alyas nga “Nelyn,” residente sa maong barangay. Lakip sa nasakmit ang nagkadaiyang brand sa smuggled nga sigarilyo sama sa Cannon, United, Bros, King Pen, Commando, ug Walter, nga gibanabana nga nagkantidad og kapin ₱26,880.
Ang tanang nakumpiskar nga butang husto nga gi-inventory ug gi-dokumento, ug karon anaa na sa kustodiya sa kapulisan alang sa hustong disposisyon subay sa balaod.
Gidayeg ni Cebu Police Provincial Office Director PCOL Abubakar Udang Mangelen Jr. ang kapulisan nga nipatuman sa operasyon ug mipasiugda sa kamahinungdanon sa padayon nga kampanya batok iligal nga patigayon. Matod pa niya, ang pagpamaligya og smuggled nga produkto makadaot sa legal nga negosyo ug makapakunhod sa kita sa gobyerno nga gigamit para sa serbisyo publiko.
Nanawagan usab ang CPPO sa publiko nga motabang sa kapulisan pinaagi sa pag-report sa mga kadudahang iligal nga kalihokan sa ilang mga komunidad, aron mapadayon ang kalinaw, kahapsay, ug lig-on nga legal nga patigayon sa tibuok Lalawigan sa Cebu.
Source: CPPO
I via Renante Socia Lada