Gipahibalo sa Cebu Provincial Government ang iskedyul sa umaabot nga mga medical ug surgical missions alang sa unang quarter sa 2026. Giawhag ang publiko nga “i-save ang petsa” ilabi na kadtong nanginahanglan og serbisyong medikal ug operasyon.
Sugdan una ang pre-screening sa mga kaso aron matino kung kinsa ang angay makabenepisyo sa mga serbisyo. Alang sa Carcar Mission, ang pre-screening ipahigayon gikan Enero 19 hangtod 30, samtang ang Bantayan Mission ipahigayon sa Enero 30 ug 31.
Samtang, gipahibalo usab nga adunay Camotes Mission nga planong ipahigayon apan ang eksaktong petsa niini ipahibalo ra sa umaabot.Giawhag ang mga residente sa Camotes Islands nga magpabiling alerto sa sunod nga pahibalo gikan sa probinsyal nga kagamhanan.
Pinaagi sa Capitol Piso Health Consultant, giimbitar sa Cebu Provincial Government ang tanang mahimong makabenepisyo sa maong mga misyon aron makapahimulos sa nagkalain-laing libre nga serbisyong medikal ug surgical nga ihatag sa mga eksperyensyadong health professionals.
Sumala kang Dr. Catalan, samtang nagpadayon ang dugayng tumong sa probinsya nga palig-onon ug kompletohon ang mga provincial hospital, ang mga medical mission usa ka mahinungdanong paagi aron masiguro nga ang serbisyong panglawas padayon nga maabot ang mga Cebuanong labing nanginahanglan og tabang.
Source: Cebu Province PIO
I via Renante Socia Lada