Gipahibalo sa PAGASA nga ubay-ubay nga mga lugar sa probinsya sa Cebu ang gibutang ilalom sa Typhoon Signal No. 2 tungod sa nagpadayon nga kusog nga hangin ug ulan nga dala sa Bagyong Tino. Ang mga residente gipasidan-an batok sa posible nga kusog nga hangin, pagbaha, ug landslide ilabina sa mga dapit nga duol sa kabukiran ug baybayon.
Apil sa mga lugar nga ilalom sa Signal No. 2 ang mga lungsod ug siyudad sa Pinamungajan, Toledo City, Balamban, Tuburan, Asturias, Tabuelan, Danao City, Carmen, Catmon, Borbon, Sogod, Compostela, Liloan, Consolacion, ug Mandaue City. Lakip usab niini ang City of Naga, Carcar, Sibonga, San Fernando, Minglanilla, Talisay City, ug Lapu-Lapu City, lakip na ang Camotes Island, Medellin, San Remigio, Daanbantayan, ug Aloguinsan.
Gipahimangnoan ang tanan nga mag-andam sa mga posibleng epekto sa bagyo sama sa pagkawala sa kuryente, pagsaka sa tubig sa suba, ug pagkahugno sa yuta. Ang mga mananagat ug residente sa baybayon gipasidan-an nga dili una molawod tungod sa kusog nga balod ug hangin.
Ang kapulisan ug mga lokal nga disaster response teams nagpabiling alerto aron masiguro ang kaluwasan sa publiko. Padayon usab ang koordinasyon tali sa Cebu Police Provincial Office (CPPO), mga LGU, ug mga ahensya sa kagamhanan aron mahatagan og tabang ug impormasyon ang mga katawhan nga apektado sa bagyo.
I via Renante Socia Lada