DAVAO CITY – Naghiusa ang 14th Infantry “Avenger” Battalion sa Philippine Army, City/Municipal Disaster Risk Reduction and Management Office (C/MDRRMO), ug uban pang ahensya sa gobyerno sa pagpatuman sa forced evacuation karong adlawa, Nobyembre 3, 2025, aron maseguro ang kaluwasan sa mga residente nga peligrohon sa hagupit ni Bagyong Tino.
Giatiman usab sa mga sakop sa kasundaluhan ug lokal nga otoridad ang pagpamutos sa relief goods, pag-apod-apod sa pagkaon, clearing operation sa mga dalan nga nababagan sa nangatumba nga kahoy, pagtukod og temporary tents, ug pagpahibalo sa publiko bahin sa mga epekto nga mahimong idala sa bagyo.
Gipahigayon kini sa tibuok 5th District sa Leyte ug sa probinsya sa Southern Leyte isip kabahin sa preparasyon ug kaluwasan sa mga lumulupyo sa dili pa moabot ang bagyo.
Tinguha sa mga sundalo ug partner agencies nga malikayan ang kadaot ug mapanalipdan ang mga katawhan gikan sa peligro samtang padayon nga gibantayan ang lihok ni Bagyong Tino.(Camille Santos Naraga)(Source: Contributed)