Malinawon ug luwas ang pagsaulog sa Kalag-Kalag 2025 sa tibuok probinsya sa Cebu, sumala sa Cebu Police Provincial Office (CPPO). Base sa datos, miubos og 57.14% ang gidaghanon sa mga krimen ug walay natala nga insidente nga may kalabotan sa Kalag-Kalag. Kini nagpakita sa epektibong pagpangandam ug koordinasyon sa mga otoridad ubos sa mando ni PRO7 Regional Director PBGEN Redrico A. Maranan uban sa iyang panawagan nga “Makabagong Pulis sa Makabagong Panahon: Respetado ang Mamamayan, Disiplinado ang Kapulisan.”
Kapin sa 6,000 ka personahe gikan sa PNP, AFP, PCG, BJMP, BFP, BPATS/BPSO, DRRMO, medical teams, ug ubang puwersa ang gipakatap sa mga sementeryo, simbahan, pantalan, terminal, tourist spots, ug dagkong karsada aron maseguro ang kalinaw ug kahapsay. Ang ilang presensya nakatabang sa paglikay sa mga krimen ug pagsiguro nga malinawon ang pagbisita sa mga sementeryo.
Gikan sa Oktubre 29 hangtod Nobyembre 2, natala ang 44.74% nga pagkunhod sa mga insidente sa Peace and Order Indicator kung ikumpara sa parehas nga petsa niadtong 2024. Walay Kalag-related nga kaso karong tuiga, kumpara sa duha ka kaso nga natala sa miaging tuig. Nakasakmit usab ang kapulisan og 19 ka bawal nga butang sama sa mga kutsilyo, ilimnong makahubog, ug mga gamit sa iligal nga sugal aron mapadayon ang kalinaw ug seguridad.
Sa padayon nga operasyon batok sa krimen, 54 ka warrant of arrest ang naserbisyo, 47 ka wanted persons ang nadakpan, ug 43 ka drug personalities ang nasikop. Narekober usab ang 143.22 gramos nga shabu nga nagkantidad og ₱973,896.00, timailhan sa padayon nga kampanya batok sa iligal nga drogas ug krimen.
Nagpasalamat si Cebu Governor Pamela T. Baricuatro sa kapulisan ug tanang ahensya sa ilang dedikasyon sa serbisyo. Samtang si CPPO Provincial Director PCOL Abubakar Udang Mangelen Jr. mipasidungog sa panaghiusa sa tanang ahensya ug katawhang Sugbuanon sa kalampusan sa Ligtas Undas 2025. Ang CPPO magpadayon sa pakigtambayayong sa mga LGU ug publiko aron mapadayon ang malinawong ug luwas nga probinsya sa Cebu bisan human sa Kalag-Kalag 2025.
Source: CPPO
I via Renante Socia Lada