Usa ka bag-o ug makahuluganon nga programa ang gilusad sa Police Regional Office 7 (PRO7) nga gitawag og Project: Tulay sa Pagbag-o (TUPA-Shepherding) niadtong Martes, Hulyo 22, sa Camp Ceferino Genovia sa Barangay Bahay, Sibonga, Cebu. Gitambongan kini sa 46 ka mga pulis nga nagikan sa nagkalain-laing yunit sa Central Visayas.
Ang TUPA-Shepherding usa ka inisyatiba nga nagtinguha sa pagtabang sa mga pulis nga nakasala sa ilang serbisyo nga makabalik sa hustong dalan. Ang programa nakasentro sa pasaylo, ikaduhang higayon, ug personal nga pagtubo aron mabalik ang pagsalig ug mapalig-on ang maayong kultura sa kapulisan.
Si PBGEN Redrico A. Maranan, Regional Director sa PRO7, ang nanguna sa maong kalihokan. Ang iyang liderato naghatag og kahigayonan nga magbag-o ang usa dili pinaagi sa silot, apan pinaagi sa suporta, giya, ug edukasyon. Ang programa usab kabahin sa ikaduhang pundasyon sa liderato ni CPNP PGen Nicolas Torre III nga nag-awhag sa panaghiusa ug moralidad sa sulod sa han-ay sa kapulisan.
Matud ni PBGEN Maranan, ang “Tulay sa Pagbabag-o” usa ka tulay alang sa gustong mausab, alang sa nangawala ang direksyon, ug alang sa tanang pulis nga gustong mahimong mas maayong alagad sa katawhan. Kini nga programa unang gisugdan ni Maranan sa Quezon City isip District Director, diin iyang gituohan nga ang matag pulis angay hatagan og ikaduhang higayon.
Ang pundasyon sa TUPA mao ang konsepto sa “Shepherding” diin pilion ang pipila ka pulis nga mahimong “Shepherds” o giya sa ilang mga kauban. Ang mga Shepherds matudloan og espiritwal nga tambag, suporta sa panglawas, edukasyon sa mga pamatasan, ug paggiya sa pagbati ug binuhatan aron matabangan ang uban nga mahimong mas epektibo ug matinud-anong alagad sa serbisyo.
Ang seminar atol sa paglusad sa programa nagtimaan sa opisyal nga pagsugod sa TUPA-Shepherding sa rehiyon. Ang unang hugna sa mga Shepherds kasamtangang gi-train ug andam na nga motabang sa mga kauban nilang nanginahanglan og tabang ug panabang.
Ang Project TUPA-Shepherding dili lang usa ka temporaryo nga programa, kundili usa kini ka taas-nga-panahon nga paningkamot nga mutabang sa mga pulis aron mamahimong mas maayong tawo sa uniporme ug bisan gawas niini.
Source: PRO7
I via Renante Socia Lada