Nabawi sa kapulisan ang unom (6) ka armas sa duha ka follow-up operations niadtong Oktubre 31, 2025, may kalabotan sa pagpusil-patay kang Police Captain Joel Deiparene kaniadtong Oktubre 25, 2025. Ang operasyon gihimo sa Cebu City ug Parañaque City uban ang pagtinabangay sa nagkalain-laing yunit sa PNP.
Sa unang operasyon sa Barangay Sudlon 2, Cebu City, gipangulohan sa Criminal Investigation and Detection Unit, City Intelligence Unit, City Mobile Force Company, Police Station 12 sa Cebu City Police Office (CCPO), ug CIDG 7, nakasakmit ang mga otoridad sa balay ni alias “Jun” ug nakuha ang usa ka STK 100 9mm pistol, usa ka 9mm magazine, usa ka M4 Carbine rifle, duha ka magazine, ug baynte (20) ka bala sa 5.56 ammunition.
Samtang, sa laing operasyon sa Parañaque City, narekober usab ang .45 caliber pistol ug 17 ka bala, nga gituohang gigamit sa pagpamusil. Ang mga armas nakaplagan sa posisyon ni alias “Rommy”, nga giingong kauban ni “Jun.” Sa imbestigasyon, nasuta nga si “Jun” nakigkita ni “Rommy” ug nagbilin kaniya sa maong armas sa dihang misurender siya sa Pasig City niadtong Oktubre 29, 2025.
Nasikop si alias “Rommy” ug karon gipreso sa Parañaque City Police Station tungod sa kapakyasan nga isurender ang armas. Ipasaka batok kaniya ang kaso sa Parañaque City Prosecutor’s Office, samtang ang tanang nabawing armas gipaubos na sa ballistic examination sa Forensic Unit aron masuta kung gigamit ba kini sa krimen.
Gipasigarbo ni PBGEN Redrico A. Maranan, Regional Director sa PRO7, ang mga operatiba sa ilang padayon nga paningkamot.
“We are pursuing a thorough and comprehensive investigation to identify and arrest all individuals involved in this heinous act. Justice will be served for the fallen officers. The Philippine National Police will not rest until those responsible are held accountable,” segon ni PBGEN Maranan.
Ang PNP nagpadayon sa operasyon aron makuha pa ang ubang ebidensya ug maestablisar ang tibuok detalye sa kaso. Gipasalig usab sa PRO7 nga walay makalingkawas sa balaod ug nga ang tanan nga nalambigit sa pagpatay ni PCPT Deiparene kasohan ug ihatag ang hustisya.
Source: PRO7 PIO
I via Renante Socia Lada