Nadakpan sa hiniusang operasyon sa Police Regional Office 7 (PRO7), Bureau of Immigration (BI), ug ubang law enforcement agencies ang duha ka South Korean nga gipangita sa ilang nasud. Ang operasyon gihimo sa magkalainlaing lugar sa Barangay Marigondon, Lapu-Lapu City niadtong Hulyo 2, 2026.
Ang mga nadakpan giila lamang sa ilang mga alyas nga “Nam” ug “Bae.” Si “Nam” nadakpan sa Pacific Grand Villa ug gipasanginlan sa nagkalainlaing kaso sa South Korea. Gawas niini, naa usab siyay napulo ka daang kaso ug giingong adunay kalambigitan sa usa ka voice phishing syndicate nga naglihok sa Cambodia.
Samtang si “Bae” nadakpan sa Saekyung Village 1 base sa warrant of arrest nga gipagawas sa korte sa South Korea. Gideklarar usab siya sa Bureau of Immigration nga undesirable, undocumented, ug overstaying alien, ug giila sa South Korean Embassy isip usa ka pugante.
Ang duha ka Korean fugitive anaa na karon sa kustodiya sa Bureau of Immigration alang sa hustong dokumentasyon ug sa ilang deportation process. Gipasalamatan ni PRO7 Regional Director PBGEN Arnold E. Abad ang maayong koordinasyon sa tanang ahensya nga miapil sa operasyon, ug giingon nga dili tugotan sa Central Visayas nga mahimong tagoanan sa mga kriminal nga naglikay sa hustisya.
📸 PRO7
I via Renante Socia Lada