Nagpahigayon og lawom nga hot pursuit operation ang Police Regional Office 7 (PRO7) aron madakpan ang mga responsable sa pagpamusil-patay ni Police Captain Joel Deiparine sa Sitio Balaw, Barangay Sudlon 2, Cebu City, kagabii sa Oktubre 25.
Base sa imbestigasyon, si PCPT Deiparine, sakop sa Criminal Investigation and Detection Group (CIDG-7), ug iyang kauban nga si PEMS Artchel Tero, nagkonduktar og surveillance operation batok sa ilang target nga si Leonardo “Jun” Manto Jr., nga adunay warrant of arrest sa kaso nga murder.
Apan samtang nagpatrolya ang duha, kalit silang gibabagan sa usa ka gray Mitsubishi Strada pickup, ug tulo ka armadong lalaki ang nanganaog ug gipaulanan sila og bala. Si PCPT Deiparine namatay diha-diha sa natad, samtang si Tero nasamdan ug nadala sa ospital.
Narekober sa crime scene ang mga basiyo sa bala, usa ka pusil, ug duha ka sakyanan, usa ka motorsiklo ug ang maong pickup nga gigamit sa mga suspetsado. Ang mga ebidensya karon anaa na sa Regional Forensic Unit 7 para sa pinal na eksaminasyon.
Matod ni PBGEN Redrico Maranan, Regional Director sa PRO7, dili nila tugotan nga ang maong krimen mapasagdan.
“We will not allow this unfortunate incident to pass without justice. We will ensure that justice will be swift, deliberate, and felt by those responsible,” segon ni PBGEN Maranan.
Nagpahimangno usab si Maranan sa tanang pulis nga magpabiling alerto ug mosunod sa operational protocols aron malikayan ang parehas nga insidente. Gipasidunggan usab sa flag ceremony karong Lunes si Capt. Deiparine pinaagi sa usa ka moment of silence isip pagpasidungog sa iyang katapangan ug serbisyo.
Ang PRO7 naggawaran og ₱100,000 cash reward alang sa bisan kinsa nga makahatag og kasaligang impormasyon kabahin sa kining si “Jun” Manto Jr. Giawhag ang katawhan nga motabang ug motaho sa pinakaduol nga police station o motawag sa 911, nga segurado nga kompidensiyal ang ilang pagkatawo.
“The sacrifice of Police Captain Deiparine will not be in vain. PRO7 stands united with his family and comrades as we pursue the perpetrators until justice is fully served,” matod ni PBGEN Maranan.
Source: PRO7 PIO
I via Renante Socia Lada