Usa ka trahedya ang nahitabo sa Barangay Cagcagan, lungsod sa Poro, human mamatay ang usa ka 18-anyos nga lalaki nga natabonan sa mga dagkong bato atol sa gidudahang illegal quarry operation didto.
Giila ang biktima nga si Jade Suralta, nga nagkolekta og limestone pasado alas-3 sa hapon niadtong niaging adlaw, sa dihang kalit nga nahugno ang pader sa quarry site. Wala na kini naabtan pa og buhi sa mga residente ug kapulisan nga mitabang sa pagresponde.
Sumala sa Provincial Environment and Natural Resources Office (PENRO), wala’y klarong permit o dokumento nga nagpamatuod nga legal ang operasyon sa maong quarry. Giingon usab nga delikado ang lugar tungod sa kawalay proper slope protection ug safety measures.
Ang mga otoridad sa Poro Municipal Police Station ug PENRO nagpadayon sa ilang imbestigasyon aron mahibal-an kinsa ang responsable ug tinuod nga operator sa maong illegal quarry site.
Gitambagan usab sa PENRO ang mga residente nga likayan ang pagtrabaho o pagpangolekta sa mga lugar nga walay permit aron malikayan ang susamang aksidente.
I via Renante Socia Lada