Nahimong usa ka dakong operasyon ang tinguha unta sa Police Regional Office 7 (PRO7) sa pagserbisyo og warrant of arrest batok sa Top 5 Regional Most Wanted Person sa Barangay Bogo, Argao, Cebu, sa kadlawon sa Disyembre 4, 2025.
Mga alas 1:40 sa kadlawon, ang Argao Municipal Police Station milihok aron dakpon ang suspek nga gipasanginlan sa paglapas sa Section 5, Article II sa Republic Act 9165. Ang warrant gikan sa Regional Trial Court sa Argao ug walay girekomendar nga piyansa.
Apan samtang nagpadayon ang operasyon, nakarekober ang kapulisan og usa ka heat-sealed nga plastic nga adunay gidudahang shabu nga mikantidad og kapin ₱40,800. Tungod niini, mas midako ang kaso sa suspek.
Gidakop usab sa operatiba ang iyang kauban nga lalaki nga nasakpan nga may dala nga .38 revolver nga puno og bala bisan wala kini lisensya. Dali silang duha nga gidala sa Argao Police Station ug gibutang sa kustodiya samtang naghulat sa presentasyon sa korte.
Gidayeg ni Regional Director PBGEN Redrico A. Maranan ang kapulisan sa Argao sa hapsay ug paspas nga operasyon. Matod niya, ang maong pagkasikop nagpakita sa padayon nga determinasyon sa PRO7 sa pagdakop sa mga wanted persons ug pagsumpo sa krimen sa rehiyon.
Giawhag usab ni PBGEN Maranan ang publiko nga magpadayon sa suporta ug kooperasyon aron mapadayon ang kalinaw ug kahapsay sa Central Visayas.
Source: PRO7 PIO
I via Renante Socia Lada