Gipasidunggan ni Police Brigadier General Redrico Maranan, Regional Director sa Police Regional Office 7 (PRO7), ang kapulisan sa Tagbilaran City sa ilang kalampusan sa pagdakop sa usa ka high-profile nga drug suspek ug pagsakmit sa 1.6 ka kilo nga shabu nga gibana-banang nagkantidad og Php10,880,000.
Ang operasyon gipahigayon atol sa usa ka planado ug koordinadong buy-bust operasyon alas 3:18 sa hapon niadtong Abril 4, 2025, sa Purok 4, Barangay Taloto, Tagbilaran City. Nasikop ang suspek nga usa ka 31-anyos nga kusinero sa restawran.
Matod sa PRO7, ang kalampusan sa maong operasyon nagpamatuod sa epektibong pagplano ug maayong pagkolekta sa impormasyon batok sa ilegal nga drugas sa rehiyon.
Gipasiugda ni PBGen Maranan ang padayon nga paningkamot sa PRO7 aron masumpo ang problema sa illegal nga drugas sa Central Visayas.
Sa pagkakaron ang suspek kasamtangang gi kustodiya sa Tagbilaran City Police Station samtang giandam ang angay nga mga kasong ikapasaka batok kaniya.
Source: PRO7- PIO
I via Renante Socia Lada
#rpndykccebu