Mas gipalig-on sa Police Regional Office 7 (PRO7) ang seguridad sa Central Visayas human makasakmit og 44 ka pusil ug duha ka eksplosibo, ug nadakpan ang 37 ka indibidwal sa sunod-sunod nga operasyon batok iligal nga armas gikan Setyembre 15 hangtod 19, 2025.
Gipahigayon ang operasyon sa lain-laing lugar sa rehiyon, diin pinakadaghan og nadakpan ang Cebu City Police Office (CCPO). Gisundan kini sa Cebu Police Provincial Office (CPPO), Mandaue City Police Office (MCPO), Lapu-Lapu City Police Office (LCPO), Bohol Police Provincial Office (BPPO), ug ang Regional Mobile Force Battalion 7 (RMFB7).
Sumala ni PRO7 Regional Director PBGEN Redrico A. Maranan, ang matag pusil nga nakuha gikan sa kadalanan nagpasabot og mas luwas nga komunidad ug mas gamay nga tsansa nga mahitabo ang krimen. Gipadayag usab niya ang pasalamat sa tanang yunit nga misalmot sa kalampusan sa operasyon.
Gipunting sa PRO7 nga ang ilang operasyon dili lamang batok iligal nga armas, apan kabahin kini sa mas lapad nga kampanya batok iligal nga drogas ug terorismo. Kini aron masiguro nga mapanalipdan ang katawhan ug mapadayon ang kalinaw sa rehiyon.
Sa katapusan, gipasabot sa PRO7 nga padayon sila sa pagpanguna sa mga inisyatiba nga makahatag og dugang kaluwasan ug kasiguruhan, subay sa direktiba sa Acting Chief PNP alang sa usa ka mas luwas ug malinawon nga Central Visayas.
Source: PRO7- PIO
I via Renante Socia Lada