Sa pagsaulog sa ika-53 anibersaryo sa deklarasyon sa Martial Law ug sa gilangkoban nga One Trillion March batok korapsyon, nanawagan ang Cebu Police Provincial Office (CPPO) ug ang Probinsyal nga Gobyerno sa Cebu nga magtinabangay ang tanan aron ang mga rali mahimog malinawayon, magsinabtanay, ug disiplinado.
Si PCOL Abubakar Udang Mangelen Jr., Officer-in-Charge sa CPPO, mipahinumdom nga gitahod sa kapulisan ang katungod sa katawhan sa pagpakita sa ilang pagbati ug pagpangayo og kabag-ohan. Apan iyang giingon nga mas kusgan ang mensahe kon kini ipakita pinaagi sa panaghiusa ug kalinaw.
Misalmot usab sa panawagan si PBGEN Redrico A. Maranan, Regional Director sa PRO7, nga nagsiguro nga ang mga pulis sa Central Visayas magpadayag og maximum tolerance apan magpabilin nga andam batok sa tanang hulga sa kaluwasan.
Ang Probinsyal nga pangagamhanan sa Cebu nagpadayag usab og suporta sa malinawayon nga pagpadagan sa kalihokan, apan nagpahinumdom nga kinahanglan kining buhaton nga responsable ug dili makadaot sa kalinaw ug kasigurohan sa publiko.
Tungod sa maong kalihokan, gibutang sa heightened alert ang kapulisan sa probinsya. Ang CPPO nagkig-alayon na usab sa tanang police stations alang sa trapiko ug mga lakang sa seguridad.
Matud pa sa kapulisan ug sa probinsyal nga liderato, protektado ang tingog sa katawhan, apan ipatuman gihapon ang balaod ug kalinaw sa tanang higayon.
Source: CPPO
I via Renante Socia Lada