Bisan pa sa pagsaulog sa Pasko sa daghang pamilya sa Central Visayas, padayon gihapon ang ka-andam sa Police Regional Office 7 (PRO7) batok sa iligal nga drogas.
Niadtong Disyembre 25, 2025, mga alas 2:25 sa hapon, nakapahigayon og buy-bust operation ang mga kapulisan sa Cebu Provincial Police Office (CPPO) uban ang Talisay City Police Station, sa Sitio Gawad Kalinga, Barangay Lawaan II, Talisay City.
Sa maong operasyon, nadakpan ang usa ka suspek nga naila sa alyas “Taloy,” 36 anyos, ug giila isip high-value individual nga nalambigit sa iligal nga pagbaligya sa drogas.
Nasakmit sa kapulisan ang kapin 315 gramos sa gituohang shabu nga gibanabanang nagkantidad og ₱2,142,000, apil ang buy-bust money ug uban pang gamit nga may kalabutan sa drogas. Ang shabu gitago sulod sa sling bag ug andam na unta ipang-apod-apod sa mga silingang komunidad.
Ang tanang ebidensya gi-markahan, gi-dokumento, ug gipadala sa Regional Forensic Unit 7 alang sa laboratory examination.
Sa pagkakaron, gitanggong ang suspek sa Talisay City Police Station, samtang giandam na ang mga kaso batok kaniya tungod sa paglapas sa Republic Act 9165 o Comprehensive Dangerous Drugs Act of 2002.
Sumala ni PBGEN Redrico A. Maranan, Regional Director sa PRO7, nagpakita ang maong operasyon sa lig-on nga paningkamot sa kapulisan nga mapanalipdan ang katawhan, ilabi na sa panahon sa kapaskuhan.
Matud pa niya, dili tugotan sa PRO7 nga madaut sa drogas ang kalinaw sa Pasko ug ang kaluwasan sa mga pamilya. Padayon usab ang mas hugot nga operasyon batok sa iligal nga drogas sa tibuok Central Visayas.
Gidasig sa PRO7 ang publiko nga magbinantayon ug makigtambayayong sa kapulisan, pinaagi sa pag-report sa bisan unsang kadudahang kalihokan, aron masiguro ang hilom, malinawon, ug drug-free nga rehiyon.
Source: PRO7 PIO
I via Renante Socia Lada