Aron mapadali ug mapahapsay ang pagrehistro ug pag-renew sa mga negosyo, ipatuman sa City Government of Dapitan ang Business One Stop Shop (BOSS) gikan Enero 5 hangtod Enero 20, 2026, nga pagahimoon sa Ground Floor sa Dapitan City Hall, matag adlaw gikan alas 8:00 sa buntag hangtod alas 5:00 sa hapon.
Kini usa ka integrated nga serbisyo diin mahimo nang iproseso sa usa ka lugar ang tanang lakang nga gikinahanglan alang sa business registration ug renewal. Tumong niini nga maminusan ang oras sa paghulat ug mapahapsay ang transaksyon sa mga negosyante sa siyudad.
Gidapit ang tanang tag-iya sa negosyo, mapa bag-o man o magpa-renew, nga motambong sulod sa gitakdang petsa ug magdala sa kompletong mga dokumento aron malikayan ang kalangan sa pagproseso.
Alang sa mga negosyong magpa-renew sa ilang business permit, gikinahanglan ang mosunod: (1) Audited Financial Statement (AFS) o Unaudited AFS o Sworn Declaration of Gross Sales or Receipts; (2) Income Tax Return (ITR); (3)Kopya sa DTI Registration
Samtang ang mga mag-aplay og bag-ong business permit gikinahanglan magpasa og: (1)DTI, SEC, o CDA Registration (photocopy); (2) Dokumento sa lokasyon sa negosyo, sama sa TCT o Tax Declaration kung gipanag-iya, o Contract of Lease, Memorandum of Agreement, o sinulat nga pagtugot sa tag-iya kung dili;
(3) Locational plan o sketch sa business site;
(4)Fire Safety Inspection Certificate (FSIC) for Occupancy nga balido pa og dili moubos sa siyam ka bulan, sumala sa Bureau of Fire Protection (BFP).
Alang sa mga establisemento nga adunay balidong FSIC, gikinahanglan usab ang Affidavit of Undertaking nga nagpasabot nga walay dakong kausaban nga gihimo sa building o pasilidad.
Gidasig sa City Government ang tanang aplikante nga sundon ang giya ug iandam daan ang mga papeles aron mas hapsay ug klaro ang transaksyon.(IKEN B. GULLEM)
Source: City Government of Dapitan