Nakab-ot na usab sa Police Regional Office 7 (PRO7) ang dakong kalampusan batok sa ilegal nga drogas human madakpan ang duha ka drug personalities atol sa buy-bust operation sa Barangay Kalunasan, Cebu City niadtong gabii sa Miyerkules, Mayo 27, 2026.
Ang nadakpan mao sila alias “Abe,” nga giila isip High-Value Individual (HVI), ug alias “Lian,” nga giila usab isip Street-Level Individual (SLI). Ang duha residente sa Sitio Kalubihan, Barangay Kalunasan, Cebu City.
Sa operasyon nga gihimo alas 11:05 sa gabii, nakumpiskar sa mga otoridad ang 875 gramos nga gidudahang shabu nga adunay kantidad nga mokabat og ₱5,950,000 sumala sa standard drug price.
Gipahigayon ang operasyon sa mga personnel sa Police Station 9 sa Cebu City Police Office uban sa City Intelligence Unit. Gawas sa gidudahang shabu, narekober usab ang ubang sachet, plastic packs, ug drug paraphernalia.
Matud pa sa PRO7, kabahin kini sa kampanya sa Department of the Interior and Local Government ubos sa “Safer Cities” initiative ni DILG Secretary Jonvic Remulla aron mapalig-on ang kampanya batok sa kriminalidad ug ilegal nga drogas sa mga komunidad.
Gipasidunggan usab ni PRO7 Acting Regional Director PBGEN Arnold E. Abad ang mga operatiba tungod sa malampusong operasyon ug giingong padayon nilang palig-onon ang kampanya batok sa kriminalidad aron masiguro ang kaluwasan sa katawhan sa Central Visayas.
Matud ni PBGEN Abad, ang maong operasyon nagpakita sa ilang lig-on nga paningkamot sa pagwagtang sa ilegal nga drogas ug mga kriminal nga elemento pinaagi sa kusog nga koordinasyon sa mga ahensya sa gobyerno.
Ang nakumpiskar nga gidudahang shabu gidala na sa Regional Forensic Unit 7 alang sa laboratory examination, samtang ang duha ka nadakpan anaa karon sa kustodiya sa Police Station 9 samtang giandam ang kasong paglapas sa Republic Act 9165 o ang Comprehensive Dangerous Drugs Act of 2002.
I via Renante Socia Lada