Nasikop sa kapulisan sa City of Naga Police Station ang Top 7 Most Wanted Person sa municipal level atol sa operasyon sa Brgy. South Poblacion, City of Naga, Cebu niadtong mga nakalabay nga adlaw.
Gibuhat ang operasyon alas 5:10 sa hapon pinaagi sa Tracker Team sa City of Naga Police Station. Nadakpan ang suspetsado base sa warrant of arrest alang sa duha ka kaso sa Acts of Lasciviousness ubos sa Article 336 sa Revised Penal Code of the Philippines.
Wala gipadayag sa mga otoridad ang ngalan sa akusado tungod kay sensitibo ang kaso ug adunay nalambigit nga menor de edad nga biktima.
Matud pa sa kapulisan, gisang-at ang kaso batok sa suspetsado niadtong Pebrero 2026. Sa imbestigasyon, nasayran nga mitago ang akusado ug nagpuyo sa balay sa iyang mga paryente sa silingang barangay aron malikayan ang pagdakop ug kaso batok kaniya.
Pinaagi sa padayon nga intelligence monitoring ug validation operations, natultolan sa mga operatiba ang giadtuan sa suspetsado ug malinawon siyang nadakpan.
Giingon sa pulisya nga gipahibalo ang akusado sa hinungdan sa iyang pagdakop ug sa iyang katungod ubos sa Miranda Doctrine sa wala pa siya gidala sa detention facility sa City of Naga Police Station samtang gihulat ang turnover ngadto sa korte nga nagpagawas sa warrant.
Gipasabot usab sa kapulisan nga kabahin kini sa ilang gipakusog nga kampanya batok sa mga wanted person aron masiguro nga maatubang sa hustisya ang mga adunay kasong kriminal.
Gidayeg ni PCOL Abubakar Udang Mangelen Jr. ang mga operatiba sa malampusong operasyon ug giingon nga magpadayon ang Cebu Police Provincial Office sa intelihente ug agresibong kampanya batok sa mga wanted person sa probinsiya sa Sugbo.
I via Renante Socia Lada