Nakadakop ang Police Regional Office 7 (PRO7) og 447 ka mga tawo atol sa gipakusgang anti-criminality operations sa tibuok Central Visayas gikan Mayo 24 hangtod 30, 2026.
Sumala sa PRO7, kabahin kini sa ilang padayon nga kampanya aron mapadayon ang kalinaw ug kahapsay sa rehiyon.
Sa maong gidaghanon, 192 ang nadakpan tungod sa ilegal nga drogas. Narekober usab sa kapulisan ang 1,816.26 gramos nga gidudahang shabu nga adunay kantidad nga kapin ₱12.35 milyon base sa standard drug price, nga giisip nga dakong hampak sa ilegal nga negosyo sa drogas sa rehiyon.
Mipadayon usab ang manhunt operations sa PRO7 nga misangpot sa pagdakop sa 120 ka wanted persons. Lakip niini ang 22 Most Wanted Persons ug 98 ka ubang wanted persons nga dugay nang gipasakaan og kaso ug gipangita sa mga otoridad.
Sa kampanya batok sa ilegal nga sugal, 109 ka tawo ang nadakpan ug nakuha ang ₱15,295 nga kantidad sa mga pusta ug kita gikan sa ilegal nga kalihokan. Samtang sa operasyon batok sa ilegal nga armas, 26 ka mga violator ang nasikop ug narekober ang 32 ka armas, usa ka explosive device, ug 115 ka bala.
Matud ni Acting Regional Director PBGEN Arnold E. Abad, nagpadayon ang PRO7 sa ilang misyon sa pagsumpo sa kriminalidad ug pagpanalipod sa katawhan sa Central Visayas. Iyang gipasalig nga ipadayon pa ang agresibong operasyon ug pakigtambayayong sa mga lokal nga panggamhanan ug uban pang ahensya aron masiguro ang mas luwas ug malinawon nga mga komunidad sa rehiyon.
I via Renante Socia Lada