Gipasidunggan sa Police Regional Office 7 (PRO7) ang mga pulis nga nagpakita og kaisog, dedikasyon ug kahanas sa ilang operasyon batok sa mga wanted person atol sa Monday Flag Raising Ceremony nga gipangulohan ni Police Brigadier General Arnold E. Abad sa Camp Sergio Osmeña Sr. sa Cebu City kagahapon Hunyo 1, 2026.
Lakip sa mga gihatagan og Medalya ng Kagalingan sila si PMAJ Joseph L. Aquino ug PCpl Ace Bryan Banilad sa Compostela Municipal Police Station. Gidayeg sila tungod sa ilang hugot nga surveillance ug malampusong warrant operation nga misangpot sa pagdakop sa Top 8 Most Wanted Person sa rehiyonal nga lebel nga gipasanginlan sa paglapas sa Republic Act 9165 ug Republic Act 10591.
Gihatagan usab og pasidungog sila si PSSg Christopher L. Segovia ug PCpl Joselito D. Saavedra sa Police Station 9 sa Cebu City Police Office. Nailhan ang duha tungod sa ilang malampusong pagserbisyo sa warrant of arrest nga misangpot sa pagkadakop sa Top 3 Regional Most Wanted Person nga gipasanginlan sa kasong murder sa Barangay Guadalupe, Cebu City.
Matod sa PRO7, ang maong pasidungog usa ka pag-ila sa walay hunong nga paningkamot sa mga kapulisan sa pagdakop sa mga wanted person ug pagpatuman sa balaod aron mapadayon ang kalinaw, kahapsay ug kaluwasan sa katawhan sa tibuok Central Visayas.
I via Renante Socia Lada