Nakadakop og 446 ka mga suspetsado ang Police Regional Office 7 (PRO7) sa nagkadaiyang operasyon sa tibuok Central Visayas gikan Mayo 31 hangtod Hunyo 6, 2026. Ang mga operasyon nagpunting sa pagbatok sa ilegal nga drogas, pagpangdakop sa mga wanted person, ilegal nga sugal, ug mga wala marehistrong pusil.
Pinakadaghan sa mga nadakpan mao ang nalambigit sa ilegal nga drogas diin 216 ka indibidwal ang nasikop. Narekober usab sa kapulisan ang kapin 797 gramos nga gituohang shabu nga adunay kantidad nga kapin ₱5.4 milyon.
Sa kampanya batok sa mga wanted person, 113 ka mga pugante ang nadakpan, lakip ang 21 Most Wanted Persons ug 92 ka uban pang wanted persons. Samtang sa operasyon batok sa ilegal nga sugal, 108 ka mga tawo ang nasikop ug nasakmit ang kapin ₱14,000 nga kwarta nga gigamit sa sugal.
Dugang pa, 30 ka mga tawo ang nadakpan sa operasyon batok sa mga loose firearms. Nasakmit usab ang 51 ka pusil, usa ka explosive device, ug 100 ka bala.
Matod ni Acting Regional Director PBGen. Arnold Abad, nagpakita kini sa padayon ug lig-on nga kampanya sa PRO7 batok sa kriminalidad aron masiguro ang kalinaw ug kaluwasan sa mga komunidad sa Central Visayas. Miingon usab siya nga magpadayon ang kapulisan sa pagpalig-on sa ilang mga operasyon ug pagdugang sa police visibility sa tibuok rehiyon.
I via Renante Socia Lada