Gidakop sa kapulisan ang usa ka 41-anyos nga construction worker sa lungsod sa Poro, Cebu, pipila lamang ka oras human siya gipasanginlan sa pagpanglugos sa usa ka 27-anyos nga babaye niadtong nakalabay nga adlaw.
Sumala sa imbestigasyon sa Poro Municipal Police Station, nahitabo ang maong insidente sa Barangay Paz. Ang babaye mitaho sa kapulisan ala1:35 sa hapon, hinungdan nga dali nga milihok ang mga pulis aron imbestigaran ang reklamo.
Sa inisyal nga imbestigasyon, nasayran nga ang biktima giingong hubog ug natulog sulod sa usa ka kwarto sa dihang gipasanginlang gipahimuslan siya sa suspek.
Human mailhan sa biktima ang giingong suspek, gilusad dayon sa mga pulis ang operasyon nga misangpot sa iyang pagdakop alas 2:40 sa hapon sa maong adlaw. Gipahibalo usab siya sa rason sa iyang pagdakop ug sa iyang mga katungod ubos sa balaod.
Karon, anaa na sa kustodiya sa Poro Municipal Police Station ang suspek samtang gipasaka na sa korte ang angayng kaso batok kaniya.
Gidayeg ni Cebu Police Provincial Director Abubakar Udang Mangelen Jr. ang paspas nga aksyon sa mga pulis. Matud niya, nagpakita kini sa ilang lig-on nga paningkamot sa pagpanalipod sa mga biktima sa kapintas ug sa pagsiguro nga manubag sa balaod ang mga nakalapas niini.
Padayon pa ang imbestigasyon sa mga otoridad aron makatigom og dugang ebidensya alang sa kaso.
I via Renante Socia Lada