Nakadokumento og dakong kalampusan ang Police Regional Office 7 (PRO7) sa ilang hugot nga kampanya batok sa krimen human madakpan ang 378 ka indibidwal, nasakmit ang mga ilegal nga drogas nga nagkantidad og ₱9.5 milyon, ug narekober ang 37 ka armas sa sulod sa 7 ka adlaw nga operasyon gikan Hunyo 8 hangtod 14, 2025 sa tibuok Central Visayas.
Ang operasyon gipahigayon subay sa mando ni Chief PNP PGEN Nicolas D Torre III nga magpatuman og paspas, intelihente, ug community-based nga pagkapulis, kabahin sa iyang three-pillar strategy alang sa kaluwasan sa publiko.
Sa maong 378 ka mga nadakpan, 90 niini ang mga wanted persons, 242 ang nalambigit sa ilegal nga drogas, 27 ang nasikop tungod sa ilegal nga sugal, ug 19 ang nadakpan nga walay papeles nga armas.
Ang mga nakumpiskar nga drogas, kasagaran shabu, nga mokantidad og ₱9.5 milyon, samtang ang mga narekober nga armas naglakip sa mga homemade ug mga walay lisensyang pusil.
Nagkahiusa ang mga Drug Enforcement Units, Intelligence Divisions, Regional Mobile Force Battalion 7, ug mga lokal nga kapulisan sa PRO7 uban sa suporta sa mga lokal nga opisyal ug aktibong komunidad sa maong operasyon.
Gidayeg ni PBGEN Maranan ang tanang personnel nga naapil sa operasyon ug gipahimug-aton ang kamahinungdanon sa preemptive ug intelligence-led nga pagbantay aron mapugngan ang lihok sa mga kriminal.
Gipasalig sa PRO7 ang padayon nga hugot nga kampanya batok sa ilegal nga drogas, mga wanted persons, ug mga loose firearms aron mapadayon ang kalinaw ug kasigurohan sa Central Visayas.
Source: PRO7
I via Renante Socia Lada