DAVAO CITY — Giaresto ang usa ka pulis human kining nagpabuto sa iyang pistola samtang nagtambong sa usa ka bunyag niadtong Dominggo, Hunyo 15, 2025, sa Purok 5-A, Barangay Los Amigos, Tugbok District.
Ang suspek usa ka Police Staff Sergeant nga naka-assign sa Calinan Police Station 10.
Base sa inisyal nga report, samtang nagtambong sa handaan pasado alas 7:45 sa gabii, nakainom ang pulis ug nakalalis sa usa ka sibilyan nga bisita usab sa maong okasyon.
Bisan pa man giingong napacify na ang panagbangi, nakurat ang mga tawo sa kalit nga pagpabuto sa pulis sa iyang armas, nga nagdulot og kahadlok sa mga nanambong.
Nakumpiska gikan sa pulis ang usa ka Glock 17 Gen 4 pistol nga adunay Serial No. PNP 72411, ug usa ka magazine nga may sulod nga napulo (10) ka bala.
Gidala ang suspek sa Los Amigos Police Station ug ang armas niini giturn-over sa Davao City Forensic Unit (DCFU) 11 alang sa paraffin test, ballistic examination, ug drug test.
Padayon ang imbestigasyon sa insidente ug posible pa nga atubangon sa pulis ang kasong administratibo ug kriminal.(Camille Santos Naraga)(Source: DCPO)