Gilusad sa Department of Tourism Region VII ug Police Regional Office 7 ang unang anti-scam program nga gitawag og “Turista iWAS Scam” aron mapanalipdan ang mga turista ug lokal nga konsumidor batok sa mga pagpanikas sa online booking.
Ang maong programa gitumong sa pagsulbad sa nagkadaghan nga kaso sa online booking scams nga makadaot sa mga biyahero ug sa imahin sa tourism industry. Pinaagi niini, gidasig ang publiko nga magbantay, makat-on sa pag-ila sa scam, ug mo-report dayon sa mga kahimtang nga adunay pagpanikas.
Gi-awhag usab ang paggamit lamang sa legit nga booking platforms ug verified nga mga establisyemento.
Apil sa kampanya ang panaghiusa sa gobyerno, tourism stakeholders, ug ubang partners aron mapalambo ang impormasyon bahin sa paglikay sa scam, pagpakaylap sa tinuod nga balita, ug pagpalig-on sa transparency sa serbisyo sa turismo.
Sumala kang PBGen Redrico A Maranan, padayon ang suporta sa kapulisan sa maong programa aron mapanalipdan ang publiko batok sa mga cybercrime nga nagtarget sa tourism sector. Giingon niya nga importante nga masiguro ang kaluwasan ug kasaligan nga pagbiyahe sa mga turista samtang nagpadayon ang pagdagsa sa mga bisita sa Central Visayas.
Ang “Turista iWAS Scam” usa ka lakang aron maprotektahan ang mga magbiyahe, mapadayon ang kredibilidad sa tourism industry, ug mapakita nga luwas ug kasaligan nga destinasyon ang Central Visayas para sa tanang bisita.
Source: PRO7 PIO
I via Renante Socia Lada