Nagpalig-on sa ilang mga operasyon ang Police Regional Office 7 o PRO7 gikan Pebrero 15 hangtod 21, 2026, nga miresulta sa 433 ka mga nadakpan ug pagkasakmit sa ilegal nga drogas nga nagkantidad og kapin ₱21.6 milyon sa tibuok Central Visayas.
Sumala sa PRO7, ang ilang kalampusan kabahin sa mas hugot ug intelihente nga kampanya batok sa ilegal nga drogas, armas nga walay lisensya, ilegal nga sugal, ug mga wanted nga personalidad, aron mapadayon ang kalinaw ug kahapsay sa rehiyon.
Sa operasyon batok sa ilegal nga drogas, 197 ka mga suspek ang nadakpan, apil ang mga high-value target ug mga bag-ong nalambigit sa drug trade. Nasakmit ang sobra tulo ka kilo nga shabu nga nagkantidad og ₱21,625,156 ug marijuana nga nagkantidad og ₱12,120.
Sa kampanya batok sa ilegal nga armas, 18 ka indibidwal ang nadakpan ug 45 ka armas, usa ka explosive device, ug 94 ka bala ang nakompiskar. Sa Oplan Katok, nadugangan pa og walo ka armas nga narekober.
Sa operasyon batok sa ilegal nga sugal, 65 ka sugarol ug kubrador ang nadakpan. Nakuha usab ang ₱9,819 nga bet money gikan sa ilegal nga mga sugal.
Samtang sa manhunt operations, 35 ka Most Wanted Persons ug 153 ka ubang wanted persons ang nadakpan sa tibuok rehiyon.
Matod ni PRO7 Director PBGen. Redrico A Maranan, nagpakita kini sa lig-on nga koordinasyon ug disiplina sa kapulisan sa Central Visayas.
Gipasalig usab niya nga padayon nilang palig-onon ang kampanya batok sa tanang matang sa krimen aron masiguro ang kaluwasan sa matag matinud-anong lungsuranon.
Ang maong mga lakang uyon usab sa programa sa Philippine National Police nga “Serbisyong Mabilis, Tapat at Nararamdaman” aron mahatagan og paspas, matinud-anon, ug mabatyagan nga serbisyo ang katawhan.
Source: PRO7 PIO
I via Renante Socia Lada