Narekord sa Cebu Police Provincial Office (Cebu PPO) ang unang opisyal nga paggamit sa Alcohol Breath Analyzer (ABA) human sa usa ka makaluluoy nga disgrasya sa dalan nga nahitabo sa National Highway sa Barangay Panalipan, Catmon, Cebu niadtong Pebrero 21, 2026.
Nahitabo ang aksidente mga alas 6:45 sa gabii, diin nagbangga ang usa ka Yamaha Mio Soul i 125 nga motorsiklo ug usa ka prime mover truck nga adunay trailer. Pareho silang padulong sa habagatan, paingon sa Dakbayan sa Cebu.
Sa inisyal nga imbestigasyon, mitungha nga misulay og overtake ang motorsiklo sa truck duol sa kurbadahon nga bahin sa highway. Sa dihang mibalik kini sa iyang linya, nasangit o nasideswipe kini sa truck.
Tungod niini, natumba ang duha ka babaye nga sakay sa motorsiklo ug naigo sa ligid sa likod nga bahin sa truck.
Ang duha ka biktima gidala dayon sa Sogod District Hospital apan gideklarar nga dead on arrival sa doktor tungod sa grabeng kadaot nga ilang naangkon.
Ang drayber sa truck, 27 anyos ug taga-Sagay City, Negros Occidental, nadakpan sa Carmen, Cebu human sa usa ka hot pursuit operation. Gidala siya sa estasyon sa pulis sa Danao City diin gi-subject sa Alcohol Breath Analyzer test.
Base sa resulta, negatibo ang drayber sa alkohol. Gi-drug test usab siya ug negatibo gihapon ang resulta.
Sumala ni PCol. Abubakar Udang Mangelen Jr., Provincial Director sa Cebu PPO, dako og tabang ang paggamit sa breath analyzer aron masiguro nga patas, klaro ug base sa ebidensya ang imbestigasyon sa mga disgrasya sa dalan. Matud niya, padayon nilang palig-onon ang paggamit sa siyentipikong pamaagi aron masiguro ang hustisya ug kaluwasan sa publiko.
Sa pagkakaron, gitanggong ang drayber sa Catmon Municipal Police Station samtang nagpaabot sa pormal nga pagsaka og kaso nga Reckless Imprudence Resulting in Multiple Homicide.
Gidasig usab sa Cebu PPO ang tanang motorista nga magmaneho og responsable ug likayan ang delikadong pag-overtake ilabi na sa mga kurbadahon ug dagkong dalan aron malikayan ang susamang trahedya.
Source: CPPO
I via Renante Socia Lada
#rpndykccebu