Gilusad sa Police Regional Office 7 (PRO7) pinaagi sa Regional Information Communication Technology Management Division (RICTMD) ang unang Drone Piloting Skills Challenge karong Huwebes, Setyembre 11, 2025 sa Camp Sergio Osmeña Sr., Cebu City.
Ang maong kalihukan nagpakita sa paningkamot sa PRO7 nga magamit ang modernong teknolohiya sa ilang operasyon ug aron mapaligon ang ka-andam sa kapulisan sa pag-atubang sa mga hagit karon nga panahon.
Gipakita sa kompetisyon ang abilidad sa 12 ka team gikan sa Lapu-Lapu City Police Office, Bohol Police Provincial Office, Regional Mobile Force Battalion, Mandaue City Police Office, Cebu Police Provincial Office, ug Cebu City Police Office. Ang matag team gilangkoban og usa ka pilot, co-pilot, spotter, ug narrator. Gilantaw sa mga hurado ang safety protocols, abilidad sa pagpalambo sa drone, katukma, paspas nga aksyon, ug misyon nga malampuson.
Apil sa obstacle course ang “Fish Net Zone” nga gisulayan ang piloto nga magpadayon og husto sa taas sulod sa pi-ot nga lugar. Lakip usab sa hagit ang pagkuha og klarong video ug hulagway sa espesipikong butang ug pagkahuman niini, kinahanglan mopapahimutang sa drone sa “H” zone nga landing area.
Gipangulohan sa Cebu City Police Office Team 2 ang kompetisyon human nakakuha og 78.84 puntos, gisundan sa CPPO Team 2 nga adunay 78.47 puntos ug CPPO Team 1 nga adunay 77.44 puntos. Nakadawat ang mga mananaog og trophy, certificate, ug cash prize samtang ang tanan nga team gihatagan og certificate of participation ug cash incentives.
Sa iyang mensahe, giingon ni PRO7 Regional Director PBGen Redrico A. Maranan nga ang paggamit sa drone usa ka dakong tabang sa modernong policing.
Gikatakda nga mahimo nang unang kalihukan ang Drone Challenge aron mapalig-on ang ka-andam sa PRO7 sa surveillance, search and rescue, disaster response, crime scene monitoring, ug crowd control. Karon, adunay 140 ka drones nga magamit sa PRO7 alang sa operasyon.
Source: PRO7-PIO
I via Renante Socia Lada