Nagpalig-on sa katakus sa kapulisan sa Bohol ang Police Regional Office 7 pinaagi sa paghatag og bag-ong sakyanan ug Information and Communications Technology (ICT) equipment sa Bohol Police Provincial Office.
Ang turnover gipahigayon atol sa Command Visit sa Camp Dagohoy kagahapon Abril 27, 2026, ubos sa liderato ni Police Brigadier General Arnold E. Abad.
Lakip sa gihatag nga mga kagamitan ang 20 ka Personnel Carrier 4×4 Mitsubishi Triton, 2 ka Honda XR 150 nga motorsiklo, ug lain-laing ICT equipment. Sumala sa PRO7, makatabang kini aron mapaspasan ang responde sa pulis, mapalambo ang koordinasyon, ug mas mapalig-on ang seguridad ilabi na sa mga lugar nga daghan og turista.
Matod ni Abad, ang maong programa nagpakita sa suporta sa liderato sa Philippine National Police aron mas mapalig-on ang katakus sa mga pulis sa pagserbisyo sa katawhan.
Gipasiugda usab niya nga importante ang maayong panagtinabangay sa mga lokal nga opisyal, barangay, ug komunidad aron masiguro nga magamit og husto ang mga bag-ong kagamitan ug mapadayon ang kalinaw ug kahapsay sa lugar.
Dugang pa niya, samtang padayon nga modawat og dagkong kalihokan ug turista ang Bohol, kinahanglan nga andam ug organisado ang tanang ahensya sa seguridad.
Gisuportahan usab sa PRO7 ang Safer Cities Initiative sa Department of the Interior and Local Government ubos sa liderato ni DILG Sec. Juanito Victor “Jonvic” Remulla, nga nagtinguha sa mas lig-on nga kalinaw ug kaayohan sa mga komunidad.
Ang maong kalihokan gitambongan sa mga lokal nga opisyal ug representante sa kapulisan, nga nagpakita sa ilang panaghiusa aron mapalambo ang seguridad sa probinsya sa Bohol.
Source: PRO7 PIO
I via Renante Socia Lada