Patay ang usa ka lalaki human gidunggab nga nahitabo sa Sitio Magtitindog, Barangay Calicanan, Pamplona, Negros Oriental sayong kadlawon sa Abril 27, 2026.
Giila ang biktima nga si Douglas Sinda Zamora, hamtong na ang panuigon ug residente sa Sitio Palibawan sa maong barangay. Sumala sa report, nakit-an na lamang siya nga wala nay kinabuhi sa dihang miresponde ang mga pulis sa lugar.
Ang suspek giila nga si Jomar Morino Pilonggo, 34 anyos, residente usab sa Sitio Magtitindog. Base sa impormasyon, miboluntaryo og surrender ang suspek sa Barangay Hall sa Barangay Calicanan human sa insidente, ug dayon gidakop sa mga otoridad.
Sa report sa kapulisan, nadawat nila ang tawag gikan kang Barangay Captain Phiel Tumimbang alas 7:00 sa buntag mahitungod sa nahitabo. Ang lugar giingong layo ug lisod adtoon, mga 30 kilometros gikan sa estasyon sa pulis ug kinahanglan pa og lakaw sulod sa mga 30 minutos gikan sa pinakaduol nga maagian sa sakyanan.
Gipangulohan ni PCPT Jame-Taylor M. Piñeda, Officer-in-Charge, ang responding team nga niadto sa lugar aron kumpirmahon ang insidente.
Padayon pa karon ang imbestigasyon sa kapulisan aron matino ang motibo sa maong krimen.
I via Renante Socia Lada and Roy Ortega