Padayon ang hugot nga implementasyon sa mga balaod sa Mandaue City Police Office ubos sa Safer Cities Initiative, nga nagtumong sa pagpalig-on sa kalinaw ug kahapsay sa komunidad.
Sumala sa report niadtong Abril 24, 2026, miabot na sa 2,419 ang kinatibuk-ang ihap sa mga violators nga narekord gikan Abril 6 hangtod Abril 24, 2026. Ang kadaghanan niini may kalabotan sa paglapas sa lokal nga mga ordinansa sa dakbayan.
Ang operasyon gipangulohan ni PCOL Cirilo B. Acosta Jr., nga nagpadayon sa pagpatuman sa disiplina ug kahapsay sa siyudad pinaagi sa mas pinalig-on nga police visibility ug regular nga operasyon.
Gipasabot sa MCPO nga ang maong lakang dili lamang para sa pagpanakop kundili aron mapahinumdoman ang publiko sa kamahinungdanon sa pagsunod sa balaod alang sa kaayohan sa tanan.
Giduso usab sa kapulisan ang kooperasyon sa mga residente, nga ilang giingong maoy yawe sa usa ka malinawon ug luwas nga Mandaue City.
Source: MCPO
I via Renante Socia Lada