Usa ka kadudahang operasyon sa pagpamaligya og iligal nga gi-import nga mga sakyanan ang nabuking sa usa ka pagpanronda nga gipahigayon kagahapong adlawa, Hunyo 9, 2025, sa Japan Surplus LTD Corp. sa Barangay San Isidro, Talisay City.
Ang maong operasyon gipangunahan sa nagkahiusang pwersa sa National Bureau of Investigation Region 7 (NBI-7), Regional Intelligence Division (RID-7), RPSPU-7, LTO-7, BOC-7, Talisay City Police Station, ug SWAT Team, subay sa direktiba sa Chief PNP nga mitubag dayon sa impormasyon kabahin sa giingong smuggling.
Basi sa imbestigasyon, nahibaw-an nga nakasulod ang mga right-hand drive nga mga sakyanan ang nasangpit nga kumpanya, nga supak sa Republic Act No. 8506, ang balaod nga nagdili sa pag-import ug rehistro sa mga sakyanang ingon niini dinhi sa Pilipinas.
Sa operasyon, 64 ka mga sakyanan ang nasakmit sa Land Transportation Office (LTO-7), kadaghanan niini multicab ug uban pang right-hand drive units. Sa maong ihap, 23 ka unit ang nadala na gikan sa compound, samtang nagpadayon pa ang imbentaryo ug beripikasyon sa uban.
Nasikop usab ang usa ka langyaw nga babaye nga taga-Peru, nga gituohang tag-iya sa Japan Surplus LTD Corp. Siya karon ubos sa kustodiya ug mag-atubang og kasong may kalabotan sa customs ug balaod sa importasyon sa mga sakyanan.
Gipadayag ni PBGEN Redrico A. Maranan, Regional Director sa Police Regional Office 7 (PRO-7), ang pasalamat sa epektibong panaghiusa sa mga ahensya.
“This raid marks a decisive step in our continued fight against smuggling and illegal importation. We commend the seamless cooperation of all agencies involved. The PNP remains fully committed to enforcing the law with integrity and professionalism,”
segon ni PBGEN Redrico A. Maranan, Regional Director sa Police Regional Office 7 (PRO7).
Gi-awhag usab sa mga otoridad ang publiko nga motaho sa mga kadudahang kalihukan may kalabotan sa iligal nga mga sakyanan.
Source: PRO7
I via Renante Socia Lada