Usa ka hugot nga operasyon ang gipahigayon sa tibuok semana gikan sa gabii sa Hunyo 2 hangtod sa kadlawon sa Hunyo 8, 2025, diin nagkahiusa ang kapulisan sa Cebu City Police Office (CCPO), lokal nga kagamhanan, ug mga force multipliers sa pagpatuman sa OPLAN BULABOG ug OPLAN BAKAL-SITA. Ang tumong sa operasyon mao ang pagsiguro sa kahapsay ug kalinaw sa tanang 80 ka barangay sa Dakbayan sa Sugbo.
Gipasiugdahan ang kalihukan ubos sa liderato ni CCPO Acting City Director PCOL Enrico E. Figueroa, kauban ang tanang police stations sa syudad ug mga espesyal nga yunit, subay sa direktiba ni PRO-7 Regional Director PBGEN Redrico A. Maranan. Gitutukan sa operasyon ang hugot nga pagpatuman sa mga ordinansa sa dakbayan ug pagpugong sa mga kriminal nga lihok.
Sa maong operasyon, 2,259 ka establisemento ang gisusi ug gilusad ang pagbantay sa mga lugar nga delikado sa krimen. Giluwas ang 141 ka minor de-edad nga nakalapas sa curfew, samtang 20 ka katawhan ang gisilutan sa mga kalapasan sama sa pag-inom sa kalsada, pagpangihi sa pampublikong lugar, bastos nga pamatasan, vandalismo, ug paglabay og basura.
Samtang nagpadayon ang mga inspeksyon, nadakpan usab ang usa ka 29-anyos nga lalaki nga residente sa Barangay Mambaling tungod sa paglapas sa RA 9165 o Comprehensive Dangerous Drugs Act of 2002. Gikumpiskar gikan kaniya ang ilegal nga drogas nga nitimbang og 0.20 gramos nga nagkantidad og ₱1,360.
Gipasiugda ni PBGEN Maranan ang kamahinungdanon sa presensya sa kapulisan ilabi na sa mga lugar nga taas ang kriminalidad. Iyang gihulagway nga ang panaghiusa sa kapulisan ug mga kauban nga ahensya mao’y yawe sa pagpatuman sa epektibong crime prevention strategies alang sa mas luwas nga komunidad sa Cebu City.
Source: CCPO
I via Renante Socia Lada