Gipangdugmok sa Police Regional Office 7 (PRO7) ang 23 ka video karera machines atol sa usa ka seremonyal nga kalihokan sa Camp Sergio Osmeña Sr., Cebu City, karong Setyembre 29, 2025.
Ang mga video karera machines usa ka klase sa iligal nga sugal ug karera sa kabayo diin ang mga tawo makapusta. Kasagaran kini makit-an sa mga komunidad ug giila nga makadaot labi na sa mga kabatan-onan tungod kay makadani kini ug makapahimulag sa ila sa mas produktibong kalihokan.
Ang mga nakumpiskar nga makina nakuha sa lain-laing lugar sa syudad atol sa operasyon nga Oplan Bulabog ug Simultaneous Anti-Criminality and Law Enforcement Operations (SACLEO). Tumong sa operasyon ang pagpahunong sa mga iligal nga kalihokan ug paghatag kasigurohan sa katawhan.
Matod pa ni PRO7 Regional Director, PBGEN Redrico A. Maranan, ang pagpanugmok sa mga makina usa ka klarong pasidaan nga dili tugotan sa kapulisan ang bisan unsang klase sa iligal nga sugal sa rehiyon.
Gidugang pa niya nga kini usa ka pamahayag sa ilang tinud-anay nga paningkamot aron maprotektahan ang kabus ug kabatan-onan nga kasagaran maapektuhan sa maong bisyo.
Nanawagan usab si PBGEN Maranan sa publiko nga magtinabangay pinaagi sa pagreport sa presensya sa iligal nga mga makina ug uban pang kalapasan aron mapadayon ang kalinaw ug disiplina sa Central Visayas.
Source: PRO7- PIO
I via Renante Socia Lada