Nakab-ot ang dakong kalampusan sa Cebu City Police Office (CCPO) human narecord ang 21.2% nga pagkunhod sa krimen gikan Enero hangtod Agosto 2025 kumpara sa parehas nga panahon niadtong 2024.
Gikan sa 4,218 ka kaso niadtong miaging tuig, nahimo na lang kini 3,325 karong tuiga. Nakab-ot usab sa CCPO ang 100% clearance efficiency, nga nagpasabot nga tanan nareport nga kaso natubag ug nare-solbar.
Sumala ni Acting City Director PCOL Enrico Evangelista Figueroa, ang kalampusan resulta sa mga operasyon sa kapulisan sama sa mas kusog nga night patrols, checkpoints, ug Oplan Bulabog. Apil usab ang Oplan Pakigsandurot nga nagpalig-on sa relasyon tali sa kapulisan ug katawhan.
Gipangayo sa CCPO ang padayon nga suporta sa komunidad aron mas malikayan ang krimen ug mapadayon ang kalinaw ug seguridad sa dakbayan.
Matod pa ni Col. Figueroa nga dili lang kini kalampusan sa kapulisan, apan kalampusan usab sa mga Sugboanon nga nagtinabangay alang sa luwas ug malinawong Cebu City.
Source: CCPO
I via Renante Socia Lada