Gipahibalo sa Police Regional Office 7 (PRO7) nga malinawon ug han-ay ang nahitabong National ug Local Elections karong tuiga sa Central Visayas, walay natala nga dakong insidente sa tibuok rehiyon.
Sumala ni PBGen Redrico A. Maranan, Regional Director sa PRO7, kini tungod sa maayo nga pagplano, paggamit sa teknolohiya, ug kooperasyon tali sa kapulisan, lokal nga mga opisyal, mga kauban nga ahensya, ug sa katawhan.
Gamit ang drone, CCTV sa mga presinto, ug live-streaming nga mga kamera, mas naampingan ang kapin 2,000 ka polling centers sa Cebu, Bohol, ug tri-cities. Ang teknolohiya nakatabang aron mas klaro, matinud-anon, ug masaligan ang proseso sa eleksyon.
Sa wala palang daan ang eleksyon naghimo na og simulation drills ang PRO7, intel-based nga assessment sa mga delikadong lugar, ug pagdeploy sa mga tactical units sama sa SWAT, EOD, ug mobile patrols. Aerial drones usab ang gigamit aron makita dayon ang sitwasyon sa dagkong lugar.
Gipahimutang usab ang regional election monitoring center nga nagkuha ug datos gikan sa field ug mga surveillance system gamit aron dali marespondehan ang posibleng hulga.
Usa sa mga nakatabang sa kalampusan mao ang aktibong partisipasyon sa katawhan.
Pinaagi sa mga report sa publiko, 11 ka tawo ang nadakpan nga nalambigit sa vote-buying sa Cebu ug Bohol. Nasakmit ang kapin ₱242,000 ug election materials nga gigamit sa maong kalihukan. Gipasaka ang kaso uban sa tabang sa COMELEC.
Hangtod karon, padayon ang seguridad nga gibuhat sa PRO7 aron masiguro ang hapsay nga paglingkod sa mga napiling opisyal.
Walay natala nga seryosong krimen nga may kalambigitan sa eleksyon, usa ka ebidensya nga epektibo ang peace and order strategy sa PRO7 ilawom sa liderato ni PBGen Maranan.
Ang PRO7 magpadayon sa serbisyo ug panalipod sa katawhan, uban ang panaad nga ipadayon ang tinuoray nga pagserbisyo sa katawhang Pilipino.
Source: PRO7- PIO
I via Renante Lada