Gipasidunggan sa Police Regional Office 7 (PRO7) ang mga police commander ug personnel nga adunay dakong papel sa malinawon ug walay insidenteng pagdumala sa seguridad panahon sa 48th ASEAN Leaders’ Summit 2026.
Nahitabo ang awarding atol sa Monday Flag Raising Ceremony nga gipangulohan ni PBGen Arnold E. Abad.
Gihatagan og Medalya ng Kagalingan sila si PCOL Isagani Fetizanan ug PCOL Arnel J. Apud tungod sa ilang maayong pagpangulo, hapsay nga pagdumala, ug epektibong mga lakang nga nakatabang aron mahimong luwas ug malinawon ang ASEAN Summit gikan Mayo 2 hangtod Mayo 10, 2026.
Gidayeg usab ang ilang paningkamot sa pagmintinar sa kalinaw ug kahapsay, ingon man sa pagpanalipod sa mga delegado ug partisipante sa tanang venue sa summit.
Ang maong award gihatag usab kang PCOL Agosto Daskeo, PMSg Alfie Dickson Sabuero, PCpl Maiko Medino, PCpl Sergio Catubig, ug Pat Jeremias Pahang Jr. human nila madakpan dayon ang upat ka tawo nga naghimo og walay otorisadong rally duol sa ASEAN Summit venue sa Lapu-Lapu City. Matod sa PRO7, ang dali nilang aksyon nakapugong sa posibleng kagubot atol sa internasyonal nga kalihokan.
Atol sa seremonya, gipahibalo usab sa Public Safety Mutual Benefit Fund, Inc. ang pagpagawas sa Members’ Benefit on Individual Equity Value ug Members’ Experience Refund isip suporta sa kaayohan ug pinansyal nga kahimtang sa mga personnel sa Philippine National Police.
Matod ni PBGen Arnold E. Abad, dako ang nahimo sa dedikasyon ug sakripisyo sa mga pulis aron masiguro ang kaluwasan ug kalinaw sa tibuok ASEAN Summit. Human sa summit, iyang gihangyo ang tanang personnel nga ipadayon ang pagpalig-on sa peace and order ug suporta sa Safer Cities initiative sa Central Visayas.
Source: PRO7 PIO
I via Renante Socia Lada