Nakadakop ang Police Regional Office 7 og 351 ka mga suspetsado atol sa gipakusog nga anti-kriminalidad nga operasyon gikan Mayo 3 hangtod 9, 2026, isip kabahin sa seguridad alang sa malinawon ug hapsay nga pagpahigayon sa 48th ASEAN Leaders’ Summit 2026.
Sa kampanya batok sa ilegal nga drogas, 135 ka indibidwal ang nadakpan ug nakumpiskar usab sa kapulisan ang 283.23 gramos nga shabu nga adunay gibanabang kantidad nga kapin ₱1.9 milyon.
Sa operasyon batok sa ilegal nga sugal, 132 ka tawo usab ang nadakpan ug nakumpiskar ang ₱23,222 nga kuwarta nga gigamit sa pagpusta sa nagkalain-laing operasyon sa rehiyon.
Samtang sa kampanya batok sa loose firearms o walay lisensya nga armas, 16 ka tawo ang nadakpan. Narekober usab sa kapulisan ang 44 ka armas ug 33 ka bala. Sumala sa PRO7, pipila sa mga nadakpan gikan sa tri-cities ug lalawigan sa Cebu nakalapas usab sa gun ban nga gipatuman alang sa ASEAN Summit, ang ilang mga kaso nadugangan pa.
Gipakusog usab sa PRO7 ang ilang manhunt operations nga misangpot sa pagkadakop sa 68 ka wanted persons, lakip ang 14 ka most wanted ug 54 ka ubang gipangita sa balaod.
Si PBGen Arnold E. Abad midayeg sa dedikasyon ug paningkamot sa mga pulis sa PRO7 tungod sa ilang malampusong operasyon sa tibuok Central Visayas.
Matud pa ni Abad, padayon nilang pakusgon ang operasyon batok sa ilegal nga drogas, sugal, loose firearms ug mga wanted persons aron maseguro ang kalinaw ug kaluwasan sa katawhan sa rehiyon.
Gipasalig usab sa PRO7 nga magpadayon sila sa agresibong law enforcement operations, police visibility ug intelligence-driven campaigns isip suporta sa kalinaw ug seguridad sa gobyerno.
Source: PRO7 PIO
I via Renante Socia Lada