Sulod sa padayon nga implementasyon sa Simultaneous Anti-Criminality Law Enforcement Operation (SACLEO), malampuson nga nakadakop ang mga personnel sa Police Station 2 ug Police Station 3 sa duha ka indibidwal nga may armas sa managlahing operasyon kagahapon Mayo 10, 2026, sa Cebu City.
Sa unang insidente mga alas 1:30 sa hapon, ang mga miyembro sa Police Station 2 SDEU/Tracker Team nga gipangulohan ni PMAJ Aris B. Tormo niresponde human sa impormasyon gikan sa usa ka concerned citizen nga adunay armadong tawo nga nag suroy-suroy sa Sitio Lower Kawayan, Barangay Sambag 2.
Pag-abot sa lugar ug pinaagi sa deskripsyon sa informant, nakumpirmar ug nailhan ang suspetsado. Nasakmit gikan kaniya ang usa ka .38 caliber revolver ug tulo ka bala. Wala siya nakapakita og legal nga papeles sa pagpanag-iya sa armas, busa dali siyang gidakop tungod sa paglapas sa Republic Act 10591 o Comprehensive Firearms and Ammunition Regulation Act.
Sa laing operasyon, mga alas 8:30 sa gabii, ang mga sakop sa Police Station 3 nga gipangulohan ni PCAPT Michael T. Sevilla niresponde usab sa report sa armado nga tawo sa Sitio Lutaw-Lutaw, Barangay Sto. Niño, Cebu City.
Didto nadakpan ang laing suspetsado nga nagdala og usa ka .22 magnum caliber revolver nga adunay sulod nga bala.
Ang duha ka suspetsado gidala sa ilang tagsa-tagsa ka estasyon sa pulis alang sa dokumentasyon ug tukmang proseso, samtang giandam na ang kaso batok kanila sa paglapas sa RA 10591.
Sumala sa Cebu City Police Office, kining kalampusan nagpakita sa ilang paspas nga aksyon ug padayon nga pagbantay aron mapadayon ang kalinaw ug seguridad sa siyudad pinaagi sa tabang sa komunidad ug aktibong operasyon sa kapulisan.
Source: CCPO
I via Renante Socia Lada