Aron masiguro ang kaluwasan ug kahapsay sa umaabot nga midterm elections, ang Police Regional Office 7 (PRO7) nagpakusog sa ilang seguridad pinaagi sa hugot nga kooperasyon sa Commission on Elections (COMELEC), mga lokal nga kagamhanan, ug ubang ahensiya sa balaod.
Usa sa mga gipatuman nga lakang mao ang COMELEC checkpoints sa nagkadaiyang lugar sa Central Visayas sukad sa pagsugod sa Gun Ban niadtong Enero 12, 2025. Hangtod karon, nakahimo na ang kapulisan og 15,528 ka mga checkpoint ug nakadakop og 170 ka indibidwal.
Sa maong nasikop, 96 ka suspek ang nadakpan atol sa police response, 45 sa buy-bust operations, 23 sa ubang mga operasyon sa pagpatuman sa balaod, ug 6 sa COMELEC checkpoints.
Sa ilang operasyon, 527 ka ilegal nga pusil ang nakumpiska—450 gikan sa police response, 47 sa buy-bust operations, 23 sa ubang operasyon sa balaod, ug 7 sa COMELEC checkpoints.
“Our preparations are designed to prevent any disruption and to ensure that the elections are carried out in a peaceful, orderly, and secure manner. The 24-hour checkpoints, along with our other security measures, will help us monitor and prevent any illicit activities that could threaten the safety of our citizens or compromise the elections”, segon ni PBGEN REDRICO A MARANAN, Regional Director.
Bisan pa nga wala pa’y nareport nga insidente nga may kalabutan sa eleksyon, padayon gihapon ang pagpatrolya surveillance, ug intelligence operations aron malikayan ang bisan unsang hulga sa seguridad. Dugang pa, ipakatap ang mga espesyal nga yunit sa kapulisan aron dali nga motubag sa emerhensya o kasamok nga may kalabutan sa eleksyon.
Si PBGen Maranan gibarugan nga ang kalinaw ug kahapsay sa eleksyon nagdepende sa panaghiusa sa kapulisan, COMELEC, gobyerno, ug labaw sa tanan, sa katawhan. Giawhag niya ang publiko nga magtinabangay, tumanon ang balaod sa eleksyon, ug gamiton ang ilang katungod sa pagboto nga responsable.
Source: PRO7-RPIO
I via Renante Socia Lada