Gipasidunggan sa Police Regional Office 7 (PRO7) ang duha ka Explosive Detection Dogs (EDD) nga nagretiro na, atol sa “Salamat Kaibigan” nga seremonya nga gihimo sa Camp Sergio Osmeña Sr., Cebu City niadtong Enero 9, 2026. Ang maong seremonya isip pagpasalamat sa ilang daghang tuig nga matinud-anong serbisyo alang sa kaluwasan sa Central Visayas.
Ang gipasidunggan mao sila EDD Vector ug EDD Django, mga Belgian Malinois nga na-assign sa Regional Explosive Ordnance Disposal and Canine Unit 7 (RECU 7). Sulod sa pito ka tuig, dako ang ilang natabang sa pagpanalipod sa dagkong kalihokan sa rehiyon ug nasud, lakip ang eleksyon, Sinulog Festival, mga relihiyoso ug kultural nga panagtigom, ug pagbisita sa mga national leaders.
Si EDD Vector, nga gipanganak niadtong 2017, mitabang sa seguridad sa daghang high-risk nga kalihokan sama sa Code 1 visits, Ligtas Undas, Miss Earth 2022, ug Suroy-Suroy Sugbo. Tungod sa iyang trabaho, walay natalang insidente sa eksplosibo sa mga kalihokan nga iyang gi-deployan.
Si EDD Django usab, nga gipanganak niadtong 2016, nailhan tungod sa iyang disiplina ug kaalerto. Dako ang iyang papel sa pag-atubang sa bomb threats, area clearing, ug uban pang importanteng operasyon sa PRO7 nga nakatabang sa pagluwas sa kinabuhi ug kabtangan sa katawhan.
Sumala kang PRO7 Regional Director PBGen Redrico A. Maranan, ang duha ka K9 dili lang mga hayop kundili mga hilum nga bayani nga andam mosugal sa peligro alang sa kaluwasan sa tanan. Bisan nagretiro na sila, magpadayon ang ilang legacy sa kalinaw ug kahapsay nga ilang natabang nga mapanalipdan.
Source: PRO7 PIO
I via Renante Socia Lada