Malampuson nga napahigayon sa Cebu City Police Office (CCPO) ang komprehensibong security operations atol sa Sinulog 2026 Launching Parade nga gihimo niadtong Enero 9, 2026, gikan sa hapon hangtod sayong gabii. Ang parada nagsugod sa Basilica Minore del Sto. Niño padulong sa Cebu City Sports Complex.
Sa pagpangulo sa Officer-in-Charge sa CCPO, PCOL George V. Ylanan, personal niyang giinspeksyon ang parade route aron masiguro ang kaluwasan ug kahapsay sa kalihokan. Iyang giila ang mga importanteng lugar nga bantayan pag-ayo aron makontrol ang kadaghan sa tawo ug dayon masulbad ang bisan unsang problema nga posibleng motumaw.
Ang Sinulog 2026 Launching Parade gipangulohan ni Cebu City Mayor Hon. Nestor D. Archival uban sa mga opisyal sa dakbayan. Mitambong usab ang nagkadaiyang kontingente ug mga mananayaw gikan sa lain-laing eskwelahan ug institusyon.
Kapin sa 706 ka personnel gikan sa nagkalain-laing ahensya sama sa PNP, AFP, CCDRRMO, CCTO, ug ubang force multipliers ang gi-deploy sa nagkalain-laing lugar.
Nagtinabangay sila aron masiguro ang police visibility, crowd control, ug traffic management sa tibuok kalihokan.
Natapos ang kalihokan alas 6:00 sa gabii ug nahuman kini sa malinawon ug hapsay nga paagi, nga walay natalang bisan unsang dili maayong insidente.
Source: CCPO
I via Renante Socia Lada