Gipakita sa Police Regional Office 7 (PRO7) ang ilang lig-on nga suporta sa seguridad sa rehiyon ug internasyonal nga panag-alayon pinaagi sa mainitong pagdawat ni Mr. Stephen McNally, Legal Attaché sa Naval Criminal Investigative Service (NCIS) sa U.S. Embassy Manila, ug sa iyang kauban nga team sa ilang courtesy visit sa Camp Sergio Osmeña Sr., Cebu City niadtong Hunyo 4, 2025.
Ang maong pagbisita may kalabutan sa umaabot nga port call o pagdunggo sa mga barko sa U.S. Navy sa Sugbo sugod karong Agosto. Ang NCIS Manila, nga mao ray Department of Defense (DoD) investigative agency sa U.S. nga permanenteng nahimutang sa Pilipinas, dako ang papel sa imbestigasyon, kontra-espionage, ug proteksyon sa mga puwersa sa U.S. nga mobisita.
Sa ilang panagtagbo, nangayo og update ang NCIS bahin sa kahimtang sa kalinaw ug kahapsay sa Central Visayas, ug gitan-aw usab ang paagi aron mapalambo ang koordinasyon sa lokal nga kapulisan. Tumong niini ang pagsiguro sa kaluwasan sa mga Amerikano nga personnel ug sa lokal nga komunidad panahon sa pagbisita sa U.S. Navy.
Si PBGEN Redrico A. Maranan, Regional Director sa PRO7, misiguro sa NCIS nga andam ug bug-os ang ilang suporta.
Nagpakita kini nga panagtagbo sa lig-on nga relasyon sa kapulisan sa Pilipinas ug sa gobyerno sa Amerika, ilabina sa aspeto sa seguridad, kalinaw, ug internasyonal nga kooperasyon sa depensa.
Source: PRO7
I via Renante Socia Lada