Nasikop sa mga sakop sa Labangon Police Station 10 ang usa ka 47-anyos nga lalaki nga nalista isip Top 6 Most Wanted Person sa dakbayan sa Sugbo, atol sa operasyon nga gipangulohan ni PMAJ Timothy Jim M. Romanillos, Station Commander sa PS10, sa nakalabay na adlaw.
Ang operasyon gihimo didto sa Sitio Cogon, Barangay Labangon, dakbayan sa Sugbo, pinasikad sa Warrant of Arrest nga gi-isyu sa Regional Trial Court (RTC) Branch 57, Cebu City niadtong Abril 11, 2025, batok sa suspek nga nahilambigit sa kaso sa pagpamaligya ug paghupot ug ginadiling drogas ilawom sa Republic Act 9165 o ang Comprehensive Dangerous Drugs Act of 2002.
Ang nasikop, residente ra usab sa maong barangay, gisikop nga walay kalalis sa mga otoridad ug giturn-over dayon sa kustodiya sa kapulisan aron atubangon ang legal nga proseso.
Si PCOL Enrico E. Figueroa, ang Acting City Director sa Cebu City Police Office (CCPO), mipadayag sa iyang dakong pagpasalamat ug pagdayeg sa mga personahe sa Labangon Police Station tungod sa ilang dedikasyon ug walay puas nga serbisyo alang sa kalinaw ug kahapsay sa syudad.
Gimandoan usab niya ang tanang police units sa CCPO nga padayon nga lig-onon ang mga operasyon batok sa mga wanted persons ug criminal elements isip kabahin sa Bagong Pilipinas nga kampanya.
Source: CCPO
I via Renante Socia Lada